दमक। झापाको चारपाने स्थित बेलडाँगीमा सम्पन्न तेश्रो साउदी अरब गोल्डकप फुटबल प्रतियोगिताको उपाधि आयोजक साउदी अरब भेट्रानले जितेको छ।

उसले उपाधि दाबेदार चर्च ब्वाईज युनाइटेड क्लब काठमाडौँलाई टाइब्रेकरमा पराजित गर्दै उपाधि जितेको हो। टाइब्रेकरमा आयोजक साउदी अरबले चर्च ब्वाईजलाई ५-४ ले पाखा लगाएको थियो।

निर्धारित समय सम्म दुबै टोलीले गोल रहित बराबरी खेलेपछि भएको टाइब्रेकरमा बिजयी टिमका लागि मिलन राई, फोफोना, उमेश कार्की, गणेश हेम्रम, सरोज कार्कीले गोल गरेका थिए।

उता पराजित चर्च ब्वाईजका साइमन लिम्बु, विबेक पौडेल, राजकुमार कन्दङ्वा र सोम थापाले मात्र गोल गर्न सके। उसका विकास थुलुङको प्रहार साउदीका गोल किपर विप्लव गुरुङले बिफल बनाएका थिए ।

फाइनल खेलको म्यान अफ दि म्याच विजयी टिमका फोफोना घोषित भए। उनले नगद ३ हजार हात पारे। वेष्ट गोल किपरको उपाधि विजयी टिमकै गोल किपर विप्लव गुरुङले हात पार्दा वेष्ट डिफेन्डरको उपाधि पनि विजयी टिमकै बिकु तामाङले हात पारे।

त्यस्तै वेष्ट मिड्फिल्डर चर्च ब्वाईजका राजकुमार कन्दङ्वा, वेष्ट फरवार्ड चर्च ब्वाईजकै सनम भुजेल, वेष्ट कोच उपाधि विजेता टोलीका सुरसिंह बिष्ट भए । उनिहरुले जनहि चार हजार हात पारे।

प्रतियोगिताको सर्वाधिक गोलकर्ताको उपाधि चर्च ब्वाईजका संतोष न्यौपानेले हात पार्दा सर्वोत्कृष्ट खेलाडिको उपाधि च्याम्पियन टोली साउदी अरब भेट्रानका उमेश कार्कीले हात पारे। न्यौपानेले ६ हजार र कार्कीले ८ हजार प्राप्त गरे। प्रतियोगिताको विजेताले नगद एक लाख एक हजार एक सय एघार तथा उप-विजेताले नगद एकाउन्न हजार एक सय एघारसँगै ट्रफी हात पारे।

प्रतियोगितामा विभिन्न ८ टिमको सहभागिता रहेको थियो। खेल श्री वीर अमरसिंह माविको खेल मैदानमा भएको थियो।