काठमाडाैं।   नेकपा एमालेले आगामी मंसिर ४ गते हुने प्रतिनिधि सभा र प्रदेश सभा निर्वाचनका लागि केन्द्रीय निर्वाचन परिचालन कमिटी गठन गरेको छ ।

पार्टी केन्द्रीय कार्यालय च्यासलमा बिहीबार बसेकाे सचिवालय बैठकले अध्यक्ष केपी शर्मा ओलीको नेतृत्वमा निर्वाचन परिचालन कमिटी गठन एमाले उपमहासचिव एवं प्रचार विभाग प्रमुख पृथ्वीसुब्बा गुरुङले जानकारी दिनुभयाे ।

कमिटीमा केन्द्रीय कमिटीका सबै केन्द्रीय सदस्य, केन्द्रीय निकाय तथा केन्द्रीय सल्लाहकार परिषद्का पदाधिकारी, प्रदेश कमिटीका अध्यक्ष, पार्टीको केन्द्रीय विभागका सचिवहरू र जनसंगठनका अध्यक्ष र महासचिवहरू रहनुभएकाे छ ।

बैठकले पार्टीका विभिन्न १५ विभागमा सचिव मनोनयन उहाँले जानकारी दिनुभयाे । उद्योग वाणिज्य तथा आपूर्ति विभागको सचिवमा सुन्दर भुसाल, कृषि तथा पशुपक्षी विभागको सचिवमा विमल शर्मा, पुस्तकालय तथा अभिलेख विभागको सचिवमा सुरज अधिकारी, पर्यटन तथा नागरिक उड्डयन विभागको सचिवमा धनेन्द्र श्रेष्ठ, युवा तथा खेलकुद विभागको सचिवमा मेघराज पौडेललाई मनाेनयन गरिएकाे छ ।

भूमि व्यवस्था विभागको सचिवमा आरसी लामिछाने, भौतिक पूर्वाधार तथा यातायात विभागको सचिवमा एसपी शर्मा, सहकारी तथा गरिबी निवारण विभागमा केवी उप्रेती, विपद् व्यवस्थापनमा सुवेद ढकाल, विज्ञान तथा प्रविधि विभागमा सञ्जीव रोकाह, सामाजिक सुरक्षा विकास विभागमा पुष्कर खाती, शहरी विकास विभागको सचिवमा गजेन्द्र थपलियालाई मनोनयन गरिएकाे गुरुङले बताउनुभयाे ।

बैठकले भौतिक पूर्वाधार तथा यातायात व्यवस्था विभाग, शहरी विकास विभाग, भूमि व्यवस्था विभाग गरी तीन विभागको गठन गरेको पनि उपमहासचिव गुरुङले जानकारी दिनुभयाे । भूमि व्यवस्था विभागको उपप्रमुखमा भीम कार्कीलाई मनाेनयन गरिएकाे छ ।

प्रचार विभाग प्रमुख गुरुङका अनुसार बैठकले स्थानीय तह विकास विभागको निर्देशिका र पार्टीको नीति अनुसन्धान प्रतिष्ठानको कार्यविधि पारित गरेकाे छ । वित्त तथा कोष व्यवस्थापन विभागद्वारा प्रस्तावित आर्थिक वर्ष २०७९/०८० को वार्षिक बजेट पारित गरेको छ ।

पार्टी प्रवेशीको सन्दर्भमा आवश्यक्ता अनुसार तल्लो कमिटीहरुले गरेको सिफारिसको आधारमा केन्द्रीय कमिटीले आवश्यक निर्णय लिने निर्णय भएको समेत उपमहासचिव गुरुङले जानकारी दिनुभयाे ।

बैठकले केही केन्द्रीय सदस्यको जिम्मेवारी हेरफेर गरेको छ । कास्कीको इञ्चार्जमा कृष्ण थापा, मधेस प्रदेशको सहइञ्चार्जमा रामदल मण्डल, महोत्तरीको इञ्चार्जमा सरोज यादव र धनुषाको सहइञ्चार्जमा प्रमोद नारायण यादव ताेकिनुभएकाे छ ।

बैठकले नवराज पौडेललाई केन्द्रीय सल्लाहकार परिषद्को सदस्यमा मनोनयन गरेको छ । जीवन गौतम, वृजेशकुमार गुप्ता, धर्मदत्त देवकोटा, अमृत राजवंशीलाई केन्द्रीय कमिटीको सदस्यमा मनोनयन गरेको छ ।