दमक।   कोरोना महामारीका कारण जारी गरिएको लामो समयको निषेधाज्ञा पछि खुलेका पसलहरुको दमकमा अनुगमन शुरु गरिएको छ । बुधबारबाट नगरपालिकाका प्रमुख प्रशासकीय अधिकृत गणेश प्रसाद तिम्सिना नेतृत्वको अनुगमन टोलीले बजार पसलको अनुगमन शुरु गरेको हो । टोलीले दमकको नगरपालिका क्षेत्र, नमुना बजार क्षेत्र, नयाँ सब्जि बजार तथा देवकोटा चोक क्षेत्र लगायत स्थानका पसलहरुको अनुगमन गरेको थियो ।

सो क्रममा सबैजसो पसलमा स्वास्थ्य मापदण्ड पालना नभएको पाइएको थियो । अनुगमनका क्रममा पहिलो पटक सबै व्यवसायीहरुलाई प्रमुख प्रशासकीय अधिकृत तिम्सिना नेतृत्वको टोलीले गराएको थियो । अधिकृत तिम्सिनाले देखिने स्थानमा अनिवार्य सेनिटाइजर राख्न र मास्कको प्रयोग गर्न सबैलाई अनुरोध समेत गर्नु भयो ।

प्राय पसलमा सेनिटाइजर देखिनेगरी राखिएको थिएन् भने दुरी पनि कायम गरिएको थिएन् । अनुगमनका क्रममा सब्जि बजार भित्रको एक पसलमा तास खेलिरहेको पनि भेटिएको थियो । सो टोलीलाई प्रहरी टोलीले तास च्यात्न लगाएको थियो भने प्रशासकीय अधिकृत तिम्सिनाले पसल बन्द गर्न भन्नु भएको थियो ।

टोलीले अब उप्रान्त मास्क तथा सेनिटाइजर सहित स्वास्थ्य मापदण्ड पालना नगरि व्यापार व्यावसाय संचालन गरिएको पाइए पसल बन्द गर्ने चेतावनी समेत दिएको छ ।

अनुगमनमा इलाका प्रहरी कार्यालयका प्रतिनिधि, दमक रेडक्रस, उद्योग बाणिज्य संघ दमकका प्रतिनिधि, नगर पालिकाको स्वास्थ्य शाखाका प्रतिनिधि लगायतको उपस्थिति रहेको थियो । अनुगमन प्रत्येक दिन गरिने छ ।