इनरुवा। सुनसरीको कोशी गाउँपालिकामा विभिन्न पार्टी परित्याग गरी पाँच सय बढी नेता कार्यकर्ताहरु नेकपा एमालेमा प्रवेश परेका छन् । यसरी पार्टी प्रवेश गर्नेहरुमा नेपाली काग्रेंस र जनता समाजवादी पार्टी सहित विभिन्न पार्टीका नेता कार्यकर्ता छन्।

लामो समयदेखि राजनीतिमा रहनुभएका नेपाली काग्रेंसका स्थानीय नेता जितेन्द्र (जितु) खेरवार सहितका नेता कार्यकर्ताहरु एमाले प्रवेश गरेका हुन् ।
कोशीका ८ वटै वडाका विभिन्न तहका विभिन्न पार्टी परित्याग गरी एकसाथ ५ सय ५१ जना नेता, कार्यकर्ता, एमालेमा प्रवेश गरेका छन् ।

एमालेका केन्द्रिय सदस्य र सुनसरी जिल्ला सह इन्चार्ज प्रदेश एकका पूर्व प्रदेश मन्त्री जगदिश प्रसाद कुसियत र युवा नेता अजय कुसियतको पहलमा उनीहरू एमालेमा प्रवेश गरेका हुन् ।

नवप्रवेशीहरुलाई सुनसरीका एमाले जिल्ला अध्यक्ष रेवतीरमण भण्डारी एवं प्रदेश १ का निवर्तमान उद्योग, पर्यटन, वन तथा वतावरण मन्त्री जगदिश प्रसाद कुसियतले टिका, माला तथा खदाँ लगाएर स्वागत गरेका थिए ।

कार्यक्रममा एमाले सुनसरीका सचिव पर्शुराम यादव, एमालेका नेताहरू रमेश श्रेष्ठ, तैयव हुसेन, निलम खनाल, कोशी युवा संघका संयोजक धिरेन्द्र पाठक, इन्चार्ज चन्दन यादव, अर्जुन कुसियत, दुली सदा , अशोक मण्डल, कोशीका कार्यपालिका सदस्य, राष्ट्रिय युवा संघ नेपालका पुकार पोखरेल, अनिता उराँव , युवानेताहरु सरिता कार्की घिमिरे, पुनम साह, नेता जफर जमाली लगायतको उपस्थिती रहेको थियो ।

कार्यक्रममा बोल्दै पूर्व प्रदेश मन्त्री जगदिश प्रसाद कुसियतले नवप्रवेशीहरूलाई एमालेले उचित स्थान दिने बताएका थिए । त्यसैगरी कुसियतले आफू मन्त्री भएपछि कोशीको मूख्य राजमार्गदेखी सिमासम्मको बाटोमा कालो पत्रे योजना, हरिपुरमा कालोपत्रे, चिल्ड्रेन पार्क, दजर्नौ मन्दिर निर्माण, पर्यटकीय क्षेत्र विस्तार लगायतको काम गरेकाले नागरिकको एमाले प्रतिको क्रेज बढेको बताए ।

उनले जनताको भरोसाको पार्टी एमाले भएको समेत बताए । आफूहरुको पार्टी संघीय सरकारबाट बाहिरिए पनि नेकपा (एमाले) प्रति जनताको भरोसा बढ्दो क्रममा रहेको भन्दै उनले मुलुकको विकास र समृद्धिका लागि केपी शर्मा ओली नेतृत्वको सरकारले गरेको ऐतिहासिक कार्यका कारण एमालेप्रति जनताको भरोसा बढेको जिकिर समेत गरे ।

उनले कोशी क्षेत्रमा नेपाली काग्रेंसले सात दशकदेखि जनताको भोट लिएपनि काम केही नगरेको दावी गर्दै एमालेले मात्रै केही गरेको उदाहरण चार वर्षमा नागरिकले हेरेको र अनुभुती समेत गरेको बताए ।

कुसियतले विकास र समृद्धिको नारा दिएको सरकार सफल भएको समेत दावी गरे । कार्यक्रममा नेता तैयव हुसेनले नेकपा एमाले फुटेको नभई केही कसिंगरहरु भागेको बताएका छन् ।

नेकपा एमाले जनताको बहुदलीय जनवाद (जबज) लाई अघि बढाउने बाटोमा रहेकाले मिल्ने पनि नेता तैयवे उल्लेख गरे ।