दुबई सनराइजर्स हैदराबादलाई ८ विकेटले पराजित गर्दै दिल्ली क्यापिटल इन्डियन प्रिमियर लिग क्रिकेट आईपीएलको शिर्ष स्थानमा उक्लिएको छ ।

बुधबार राति अबेर सम्पन्न खेलमा हैदराबादले प्रस्तुत गरेको १ सय ३५ रनको लक्ष्य दिल्लीले खेल सकिन १३ बल बाँकी छँदै १ सय ३९ रन बनाउँदै पार गरेको थियो।

१८ औ ओभरको ५ औ बलमा श्रेयस ऐरले छक्का प्रहार गर्दै दिल्लीलाई शानदार जित दिलाए। ऐरले ४१ बलमा २ चौका र २ छक्काको सहायतामा ४७ तथा कप्तान रिसब पन्तले २१ बलमा ३ चौका र २ छक्कासहित ३५ रन बनाउँदै अविजित रहे।

त्यस्तै ओपनर शिखर धवनले ३७ बलमा ६ चौका र १ छक्कासहित ४२ रनको योगदान दिएका थिए । यसअघि दुबईमा टस जितेर ब्याटिङ गरेको हैदराबादले ९ विकेटको क्षतिमा १ सय ३४ रन मात्र बनाउन सक्यो। उसका अब्दुल समादले २८ तथा रसिद खानले २२ रनको योगदान दिन बाहेक अन्यले उल्लेख्य प्रदर्शन गर्न सकेनन्।

जितसँगै दिल्ली ९ खेलबाट १४ अंक जोड्दै लिगको शिर्ष स्थानमा उक्लिएको छ। हैदराबाद ८ खेलबाट २ अंक जोड्दै लिगको पुछारमा छ।