दमक। झापाको दमकमा सोमबारबाट शुरु हुने प्रदेश स्तरीय अन्तर पालिका प्रथम वडा अध्यक्ष कप भलिबल प्रतियोगिताको सम्पूर्ण तयारी पुरा भएको छ।

दमक-३ स्थित प्रस्तावित मदनभण्डारी रंगशालामा संचालन हुने सो प्रतियोगितामा प्रदेश १ का १९ ओटा पालिकाको सहभागिता रहेको खेल संयोजक राजु श्रेष्ठले जानकारी दिनुभयो।

वडा खेलकुद समितिको आयोजनामा हुनलागेको सो प्रतियोगिताको उद्घाटन खेलमा इलामको चुलाचुली गाउँपालिका र मोरङको उर्लाबारी नगरपालिकाबीच खेल हुनेछ। सो खेल बिहान ८ बजे हुनेछ।

त्यस्तै भोलि हुने दोश्रो खेलमा लेटाङ्ग नगरपालिका र कनकाई नगरपालिका बिहान ९ बजे आमनेसामने हुनेछन् । भोलि नै हुने तेश्रो खेलमा शिवसताक्षी नगरपालिका र बाह्रदशी गाउँपालिका बिहान १० बजे प्रतिश्पर्धा गर्नेछन्।

त्यस्तै बिहान ११ बजे बुद्धशान्ति गाउँपालिका र झापा गाउँपालिका आमनेसामने हुँदा १२ बजे भद्रपुर नगरपालिका र बेलबारी नगरपालिका तथा १ बजे कमल गाउँपालिका र बिर्तामोड नगरपालिका आमनेसामने हुनेछन्। त्यस्तै २ बजे केराबारी नगरपालिका र आमचोक गाउँपालिका आमनेसामने हुँदा ३ बजे दमक नगरपालिका र मेची नगरपालिका प्रतिश्पर्धा गर्नेछन्।

प्रतियोगिताको विजेताले नगद एक लाख प्राप्त गर्नेछ भने उपविजेताले नगद ५० हजार हात पार्नेछ । त्यस्तै प्रतियोगिताको उत्कृष्ट खेलाडीले नगद ५ हजार प्राप्त गर्ने छन् भने म्यान अफ दि म्याचले २ हजार हात पार्ने छन्।