ज्ञानेन्द्र खैजु, ललितपुर ।  नेपाल बुद्धिचाल संघका पूर्वअध्यक्ष एवं सहकारी अभियन्ता स्व.राजेशहरि जोशीस्मृति फिडे रेटिङ्ग बुद्धिचाल प्रतियोगितामा चौथौं दिन छैटौं र सातौं चरणका खेलहरु सम्पन्न भयो ।

कुमारीपाटीस्थित अग्नि पार्टी प्यालेसमा संचालित खेलमा सजिलोसिभी डटकमका फिडेमास्टर रुपेश जैसबाल साढे ६ अंकसहित एक्लै शिर्षस्थानमा रहेका छन् ।

रुपेशले छैटौं चरणको खेलमा ३ पटकका पूर्वनेपाल च्याम्पियन बद्रिलाल नेपालीलाई माथ गरे भने सातौं चरणमा भक्तपुरका युवा खेलाडी निकेन कुसाथालाई पराजित गरे ।

ललितपुर स्पोर्टस् क्लबद्धारा आयोजित प्रतियोगितामा रौतहटका युवा खेलाडी सुमन लामा र सर्लाहीका कमल श्रेष्ठ समान ६ अंकका साथ संयुक्तरुपमा दोश्रो स्थानमा रहेका छन् ।

सुमनले छैटौं खेलमा एसियन एमेच्योर च्याम्पियन हेटौडाका कृष्ण थापालाई पन्छाए भने सातौंमा बद्रिलाललाई निराश पारे ।

त्यस्तै कमलले आयोजक क्लबका सजिन महर्जन र फिडे मास्टर मनिष हमालमाथि जित हात पारेका थिए ।

त्यसैगरी चितवनका युवा खेलाडी अर्जुन घिमिरे, भक्तपुरका भेट्रान गणेशमान दुवाल, थापाथलि चेस क्लबका फिडे मास्टर क्षितिज घिमिरे, डाइनामिक चेस एकेडेमी दमकका भुपेन्द्र निरौला, दोलखाका आशिष फुँयाल र मखन चेस क्लबका फिडे मास्टर सुजेन्द्रप्रसाद श्रेष्ठले समान साढे ५ अंक जोडेका छन् ।

पाँच दिने प्रतियोगितामा स्वीस लिग अनुसार ९ चरणका खेलहरु हुनेछ । जसमा विजेताले ५० हजार, दोश्राले ३० हजार, तेश्राले २० हजार नगद पुरस्कार प्राप्त गर्नेछन् भने उत्कृष्ठ ३३ जनाले कुल ३ लाख १० हजार नगद पुरस्कार पाउने छन् ।

भोलि बिहान ८ः०० बजे आठौं र दिउँसो १२ः३० बजे नवौं चरणका खेलहरु हुनेछन् भने ४ः०० बजे पुरस्कार वितरण तथा समापन कार्यक्रम हुने आयोजक क्लबका अध्यक्ष हेराकाजी महर्जनले बताउनु भयो ।