दमक। झापाको चारपानेमा जारी तेश्रो साउदी अरब गोल्डकप फुटबल प्रतियोगितामा आयोजक साउदी अरब भेट्रान सेमिफाइनल प्रवेश गरेको छ।

उसले तीन अफ्रिकन खेलाडी सहित मैदान उत्रिएको एकता स्पोर्टिङ्ग क्लब चारपानेलाई २-१ ले पाखा लगाउँदै अन्तिम चारमा स्थान सुरक्षित गरेको हो।

यद्यपि खेलमा अग्रता भने पहिलो हाफको ३ मिनेटमा नै युमीको गोलबाट एकताले लिएको थियो। त्यसपछि एकताकै जर्सी नम्बर ६ का दिबिसन गिरीले १७ औं मिनेटमा आत्मघाती गोल गरेपछि खेल बराबरीमा पुगेको थियो।

पहिलो हाफ बराबरी खेलेको साउदी अरब भेट्रानले दोश्रो हाफमा उत्कृष्ट पुनरागमन गर्दै दोश्रो हाफको १४ औं मिनेटमा अग्रता लियो। उसका जर्सी नम्बर ९ का रोहन कार्कीले दर्शनीय गोल गर्दै टिमलाई २-१ को अग्रता दिलाए। त्यसपछि पाएका अबसरलाई दुबै टोलीले खेर फाल्दा खेलमा आयोजकले बाजी मार्यो।

खेलको म्यान अफ दि म्याच आयोजककै रोहन कार्की भए। उनले नगद ३ हजार हात पारे। बुधबार पहिलो सेमिफाइनल खेलमा चर्च ब्वाईज काठमाडौँ र फोकस १६ एफसी धरान आमनेसामने हुनेछन्।

प्रतियोगिताको विजेताले नगद एक लाख एक हजार एक सय एघार तथा उप-विजेताले नगद एकाउन्न हजार एक सय एघार रुपैयाँ प्राप्त गर्ने छन्। खेल श्री वीर अमरसिंह माविको खेल मैदानमा भइरहेको छ।