काठमाडौं ।  नेकपा एमाले झापाका नेता तथा राष्ट्रिय सभाका सदस्य देवेन्द्र दाहालले प्रधानमन्त्री शेरबहादुर देउवाले पाएको एक सय ६५ मतलाई नयाँ जनमतको रुपमा समर्थन गर्न नसकिने बताउनु भएको छ । राष्ट्रिय सभाको बुधबारको बैठकको विशेष समयमा बोल्दै दाहालले यस्तो बताउनु भएको हो ।

उहाँले जसपा र एमालेको संस्थागत निर्णय बिनै गुटले मत हालेकाले ती जनमतलाई लत्याइएका व्यक्तिगत मत भएको उल्लेख गर्नुभयो । नेता दाहालले पार्टी निर्णय बिनाका सांसदहरुको मत अदालतका परमादेशलाई पुष्टि गर्ने नक्कली प्रमाण मात्रै भएको टिप्पणी समेत गर्नुभयो ।

दाहालले भन्नुभयो – ‘प्रतिनिधि सभामा प्रधानमन्त्री शेरबहादुर देउवाको पक्षमा आएको एक सय ६५ मतलाई नै नयाँ जनमत आयो भनेर समर्थन गर्न सकिदैनँ । किनभने नेपाली कांग्रेसका ६१ जना, माओवादी केन्द्रका ४९ जना र जनमोर्चाका १ जनाबाहेक अरु मतहरु कुनै पार्टीले निर्णय गरेर देउवाजीलाई भोट हालेको अवस्था होइन ।

जसपाको कुरा गर्नुहुन्छ भने सिंगो पार्टीले संस्थागत निर्णय गरेर होईन, आफ्नो गुटले जनादेश विपरित हालेका मतहरु हुन् । बाँकी एमाले भनिएकाहरुले हालेका २२ मतहरु पार्टीको टिकटमा चुनाव लडेर पार्टीलाई नै धोका दिएर, जन अभिमतलाई लत्याएर हालेका व्यक्तिगत मतहरु हुन् । के उनीहरुलाई जनताले संसदमा कांग्रेसलाई भोट हाल्न पठाएको हो र भन्दै नेता दाहालले प्रतिप्रश्न समेत गर्नुभयो ।

उहाँले भन्नुभयो, “त्यस्ता मतहरुलाई कसरी जनादेश प्राप्त मतहरु भन्न सकिन्छ ? पार्टी निर्णय बिनाका मतहरु भनेका अदालतको परमादेशलाई पुष्टि गर्ने नक्कली प्रमाण मात्र हुन् । तिनलाई जनादेश भन्न सकिँदैन ।”