बिर्तामोड। नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले माधव कुमार नेपालको पार्टीले आगामी निर्वाचनमा वडा सदस्य पनि जित्न नसक्ने दाबी गर्नु भएको छ ।

आज झापाको बिर्तामोडमा आयोजित अगुवा कार्यकर्ता भेलालाई सम्बोधन गर्दै अध्यक्ष ओलीले यस्तो दाबी गर्नु भएको हो। अध्यक्ष ओलीले एमाले फुटेको नभइ पिलो फुटेजस्तो मात्र भएको धारणा राख्नुभयो।

उहाँले नेता नेपालले पनतको बाटो रोजेको भन्दै  माधव नेपाललाई कमरेड नभन्न आग्रह समेत गर्नु भयो। ओलीले भन्नु भयो, कमरेड माधव नेपाल होइन, एमाले विरोधी माधव नेपाल ।’

त्यस्तै माधव नेपालले कसैले अह्राए अनुसार पार्टी फुटाएको र नेपालको कम्युनिस्ट आन्दोलनलाई धरासायी बनाउन भूमिका खेलेकाे ओलीको भनाई थियो ।

त्यस्तै अध्यक्ष ओलीले माओवादी केन्द्रका अध्यक्ष प्रचण्डको पनि चर्को आलोचना गर्नु भएको थियो । उहाँले प्रचण्डलाई धोकेबाज नेताको संज्ञा दिनुभयो।

प्रचण्डले नेता कार्यकर्तालाई अलमल्याउने मात्र काम गरेको भन्दै ओलीले भन्नु भयो ‘प्रचण्ड असल बाबु हो, असल काका हो, असल ससुरा हो, असल सम्धी हो । तर धोकेबाज नेता हो,’ ।

अध्यक्ष ओलीले ‘ प्रचण्डले नेता कार्यकर्ताको रगत, पसिनामाथि आफ्नो राजनीतिक दुनो सोझो पारेको धारणा समेत राख्नु भयो।’