काठमाडौं । एनभिए राष्ट्रिय महिला तथा पुरुष भलिबल च्याम्पियनसिपको महिलातर्फको उपाधि न्यु डायमण्ड एकेडेमीले हात पारेको छ ।

त्रिपुरेश्वरस्थित राष्ट्रिय खेलकुद परिषद् (राखेप) को  कभर्डहलमा भएको खेलमा विभागीय टोली सशस्त्र प्रहरी बल एपीएफलाई ३-१ को सेटमा पराजित गर्दै न्यु डायमण्ड विजयी भएको हो ।

राष्ट्रिय टोलीका खेलाडीले भरिएको एपीएफविरुद्ध पहिलो सेटमा पराजय भोगेको न्यु डायमण्डले पुनरागमन दोश्रो सेटमा उत्कृष्ट पुनरागमन जनाउँदै लगातार जित निकालेको थियो । न्यु डायमण्डको जितमा प्रतिभा माली, अरुणा शाही, ललिता नाथ, झरना श्रेष्ठ, बाल्मिका आचार्यले उत्कृष्ट प्रदर्शन गरे ।

पहिलो सेट २४-२६ ले गुमाएको न्यु डायमण्डले दोश्रो सेट २५-२१ ले आफ्नो पक्षमा पार्दै बराबरी गरेको थियो भने तेश्रो सेट २५-१७ ले जित्यो। त्यसपछि चौथो सेटमा २५-१५ को जित निकाल्दै उसले उपाधि कब्जा गरेको हो ।

जितसँगै च्याम्पियन न्यु डायमण्डले ४ लाख हात पारेको छ भने उपविजेता एपीएफले २ लाख प्राप्त गर्यो।  तेस्रो भएको सेनाको त्रिभुवन आर्मी क्लबले १ लाख प्राप्त गरेको छ।