दमक। झापाको दमकमा जारी प्रदेश स्तरीय वडा अध्यक्ष कप भलिबल प्रतियोगितामा जित हासिल गर्दै दमक नगरपालिका प्रतियोगिताको दोश्रो चरणमा प्रवेश गरेको छ। उसले झापाकै मेची नगरपालिकालाई २५-२० र २५-१३ को सोझो सेटमा पराजित गर्दै प्रतियोगितामा विजयी शुरुवात गरेको हो।

जितसँगै दमकले कमल गाउँपालिकासँगको भेट पक्का गरेको छ। कमलले उपाधि दाबेदार विर्तामोड नगरपालिकामाथि २६-२४ र २५-२१ को जित निकालेको थियो ।

त्यस्तै आजै सम्पन्न अन्य खेलमा जित हासिल गर्दै चुलाचुली गाउँपालिका इलाम, आमचोक गाउँपालिका भोजपुर, बेलबारी नगरपालिका मोरङ, झापा गाउँपालिका झापा, लेटाङ्ग नगरपालिका मोरङ र बाह्रदशी गाउँपालिका झापा प्रतियोगिताको दोश्रो चरणमा प्रवेश गरेका छन्।

भोलिको पहिलो खेल हतुवागडी गाउँपालिका भोजपुर र लेटाङ्ग नगरपालिका मोरङबीच हुने खेल संयोजक राजु श्रेष्ठले जानकारी दिनुभयो।

प्रतियोगिताको विजेताले नगद एक लाख प्राप्त गर्ने छ भने उपविजेताले नगद ५० हजार हात पार्ने छ। खेल दमक-३ स्थित प्रस्तावित मदनभण्डारी रंगशालामा संचालन भैरहेको छ।