दुबई । दुबईमा जारी ट्वान्टी-ट्वान्टी विश्वकप क्रिकेटमा इण्डिया विरुद्ध पाकिस्तानले शानदार जित हासिल गरेको छ।उसले चिरप्रतिद्वन्द्वी इण्डियालाई १० विकेटले पराजित गरेको छ। पाकिस्तानका लागि ओपनर तथा कप्तान बाबर अजाम र मोहम्मद रिजवान नै पर्याप्त भए। दुबई इन्टरनेशनल क्रिकेट स्टेडियममा टस हारेर पहिले ब्याटिङ गरेको इण्डियाले प्रस्तुत गरेको १ सय ५२ रनको लक्ष्य लिएर मैदान उत्रिएको पाकिस्तानले उत्कृष्ट प्रदर्शन गर्दै जित हात पारेको हो।

यसअघि टस हारेर पहिले ब्याटिङ गरेको इण्डियाका लागि कप्तान बिराट कोहलीले ५७ तथा रिसब पन्तले ३९ रन जोडेपछि इण्डियाले पाकिस्तान सामु जितका लागि एक सय ५२ रनको लक्ष्य प्रस्तुत गरेको थियो।

उसको ओपनर रोहित शर्मा गोल्डेन डक आउट भएका थिए भने केएल राहुल ३ तथा सूर्य कुमार यादव ११ रनमा पेबेलियन फर्किएका थिए। त्यस्तै रबिन्द्र जडेजाले १३ तथा हार्दिक पाण्डेले ११ रनको योगदान दिए।