दमक। रेड स्टार क्लब बिर्तामोडलाई पाखा लगाउँदै फोकस १६ धरान झापाको चारपानेमा जारी तेश्रो साउदी अरब गोल्डकप फुटबल प्रतियोगिताको सेमिफाइनलमा प्रवेश गरेको छ। उसले बिर्तामोडलाई २-१ गोल अन्तरले पराजित गर्दै सेमिफाइनलमा स्थान सुरक्षित गरेको हो।

विजयी टिमका लागि अनिष पुलामी र अनिष चौधरीले गोल गरे। पुलामीले दोश्रो हाफको १३ औं र चौधरीले १७ औं मिनेटमा गोल गरेका थिए।

यद्यपि खेलमा अग्रता भने बिर्तामोडले पहिलो हाफको १४ औं मिनेटमा सानुका साँबाको गोलबाट लिएको थियो। खेलको म्यान अफ दि म्याच धरानका कप्तान बर्तमान राई घोषित भए। उनले नगद ३ हजार हात पारे ।

अब उसले अन्तिम दुई प्रवेशका लागि काठमाडौंको चर्च ब्वाईजसँग प्रतिस्पर्धा गर्ने छ। मंगलबार आयोजक साउदी अरब भेट्रान र एकता स्पोर्टिङ्ग क्लब चारपाने आमनेसामने हुनेछन्।

प्रतियोगिताको विजेताले नगद एक लाख एक हजार एक सय एघार तथा उप-विजेताले नगद एकाउन्न हजार एक सय एघार प्राप्त गर्ने छन्।