झापा। भारत एशिया कपबाट बाहिरीएको छ । युएईमा जारी एशिया कप क्रिकेट प्रतियोगिताको बुधबार सम्पन्न खेलमा पाकिस्तान विजयी भएसँगै भारत एशिया कप क्रिकेटको उपाधि होडबाट बाहिरीएको हो ।

उसले अफगानिस्तानलाई रोमाञ्चक खेलमा एक विकेटले पराजित गर्यो । जितसँगै पाकिस्तान एक खेल अगाबै प्रतियोगिताको फाइनलमा प्रबेश गरेको छ । अफगानिस्तानले प्रस्तुत गरेको एक सय ३० रनको लक्ष्य उसले खेल सकिन चार बल अगाबै पुरा गर्यो ।

अन्तिम ओभरको अघिल्ला दुई बलमा नसिम शाहले लगातार छक्का प्रहार गरेपछि पाकिस्तानले एक सय ३१ रन बनाउँदै फाईनल यात्रा तय गरेको छ । नसिमले चार बलमा १४ रन बनाए ।

पाकिस्तानका लागि सादाब खानले ३६ रन तथा इफदिकार अहमदले ३० रन बनाए। मोहम्मद रिजवानले २० तथा आसिफ अलिले १६ रन बनाए। फकर जमामले ५ तथा मोहम्मद नवाजले ४ रन बनाए। अफगानस्तानका लागि फैजल फारुकि र फरिक अहमदले समान ३/३ तथा रशिद खानले २ विकेट लिए।

त्यसअघि टस हारेर पहिले ब्याटिङ गरेको अफगानिस्तानले २० ओभरमा ६ विकेट गुमाएर १ सय २९ रन बनाएको थियो । अफगानिस्तानका लागि ईब्राहिम जाड्रानले तथा हर्जलुल्लाह जाजइले २१ रन बनाए । रशिद खानले अविजित १८ तथा रमिउल्लाह गुर्वाजले १७ रन बनाए ।

करिम जन्नतले १५ तथा नजिबुल्लाह जाड्रान र अजमतुल्लाह उमरजाईले समान १०/१० रन बनाए । पाकिस्तानका हरिस राउफले २ विकेट लिए । निसम शाह, मोहमद हसनेन, सादब खान र मोहमद नवाजले १/१ विकेट लिए ।

यसअघि सुपर चारको पहिलो खेलमा उसले चिरप्रतिद्धन्द्धी भारतलाई पाखा लगाएको थियो । पाकिस्तानले अब सुपर चारको अन्तिम खेलमा श्रीलंकासँग तथा भारतले अफगानिस्तानसँग प्रतिस्पर्धा गर्नेछन् ।