दमक। झापाको दमक नगरपालिकाका प्रमुख प्रशासकीय अधिकृत डम्बरुप्रसाद निरौलाले कार्यालयको क्वार्टरभित्रै अनैतिक हर्कत गरेको भिडियो बाहिरिएपछि उनले सो कोठामा रङरोगन गर्न लगाएका छन् ।

क्वार्टरभित्रै ‘गर्ल फ्रेन्ड’ राखेर अनैतिक गतिविधि गर्दै आएका उनको भिडियो टिकटक लाइभमार्फत बाहिरिएको थियो ।

गल्ती ढाकछोप गर्न प्रमुख प्रशासकीय अधिकृत निरौलाले क्वार्टरमा रङरोगन गरेर प्रमाण नष्ट गर्न सुरु गरेका हुन् ।

भिडियोमा देखिएको कोठा नगरको क्वार्टर नभई काठमाडौंको एक होटल भएको दाबी गर्दै आएका निरौलाले क्वार्टर नभएको पुष्टि गर्न रङरोगन गरेका हुन् ।

रातारात क्वार्टरमा रङरोगन किन गर्नुभएको भन्ने प्रश्नमा निरौलाले नियमित सरसफाई अन्तर्गत कोठाको रङरोगन गरिएको दाबी गरे ।

अधिकृतको क्वार्टरमा मदिरा सेवन गरी लठ्ठ भएकी महिलाले आफ्नो टिकटक लाइभ गरेसँगै निरौलासँगको अनैतिक गतिविधि सार्वजनिक भएको थियो ।

यता नगर प्रमुख रामकुमार थापासँग यस विषयमा कुरागर्न खोज्दा नबोल्ने भन्दै पन्छिएका छन् । भिडियोमा दुबै जना मदिराले लठ्ठ भएको देखिएका थिए।