पाडाजुँगी। पूर्वपश्चिम राजमार्ग अन्तर्गत निर्माणाधीन काँकरभिट्टा–लौकही सडक आयोजनाको सिलसिलामा झापाको कमल गाउँपालिकामा एचआईभी/एड्स, यौन रोग तथा मानव बेचबिखनसम्बन्धी सचेतना कार्यक्रम सम्पन्न भएको छ।

शुक्रबार पडाजुंगी स्तिथ रोड स्टार सभाहलमा आयोजित उक्त कार्यक्रम भौतिक पूर्वाधार तथा यातायात मन्त्रालय र एशियाली विकास बैंक (ADB) को आर्थिक सहयोगमा सञ्चालित राजमार्ग अभिवृद्धि आयोजना अन्तर्गत गरिएको हो।

कार्यक्रममा वडा नम्बर ३, ४ र ५ का स्थानीय बासिन्दा, सडक निर्माणमा संलग्न श्रमिक, यातायातकर्मी र अन्य चलायमान जनसंख्यालाई लक्षित गरी एचआईभी/एड्स, यौन रोग र मानव बेचबिखनका जोखिमबारे जानकारी दिइयो।

लैङ्गिक समानता तथा सामाजिक समावेशीकरण विज्ञ जीवन सिंहले सडक निर्माणसँगै बाहिरबाट आउने कामदारहरूको उपस्थितिले महिलाहरू, बालबालिका र स्थानीयमा यौनजन्य हिंसा, दुर्व्यवहार र मानव बेचबिखनको जोखिम बढ्ने सम्भावना औँल्याउँदै समयमै परीक्षण, उपचार र सतर्कता आवश्यक रहेको बताइन्।

स्वास्थ्यकर्मी दीपक दाहालले एचआईभी/एड्स र यौन रोगसम्बन्धी जानकारी प्रस्तुत गरेका थिए भने दमक इलाका प्रहरी कार्यालयका सई कुमार खतिवडाले मानव बेचबिखन र लागु औषध सम्बन्धी जोखिम र सुरक्षा उपायबारे प्रोजेक्टरमार्फत प्रस्तुति दिएका थिए।

कार्यक्रममा शिक्षक, सामाजिक संस्थाका प्रतिनिधि र स्थानीय गरी ५० भन्दा बढीको सहभागिता थियो।

विज्ञ सिंहका अनुसार झापा, मोरङ र सुनसरी जिल्लाका विभिन्न पालिकामा यस्ता जनचेतना कार्यक्रमहरू सञ्चालन भइरहेका छन्। साथै, सडक छेउका विभिन्न स्थानहरूमा चेतनामूलक साइनबोर्डहरू पनि राखिनेछ। कार्यक्रमको सहजीकरण सिंहले नै गरेकी थिइन्।