काठमाडौं ।  नेपाली कांग्रेसका सभापति शेरबहादुर देउवा प्रधानमन्त्री भएपछिको पहिलो प्रतिनिधिसभाको बैठक सुरु भएको छ । दोश्रो पटक पुनस्थापना भएको प्रतिनिधिसभा बैठक पुनस्थापनापछि आह्वान भएको पहिलो बैठक सुरु भएको हो ।

आज प्रतिनिधि सभाको दुईवटा बैठक बस्ने छ । पहिलो बैठकले राष्ट्रपति कार्यालयबाट आएका पत्रहरु प्रस्तुत गरिने, सरकारले ल्याएका अध्यादेशहरु प्रस्तुत गरिने तथा शोकप्रस्तावहरु पारित गरिने सभामुख सापकोटाले जानकारी दिनुभएको छ ।

त्यसपछि आजै बस्ने प्रतिनिधि सभाको दोस्रो बैठकमा प्रधानमन्त्री शेरबहादुर देउवाले विश्वासको मत लिने कार्यसूची तय गरिएको छ । गत जेठ ७ गते तत्कालिन प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले दोश्रो पटक प्रतिनिधिसभा विघटन गर्नु भएको थियो ।

त्यसपछि गएको असार २८ गते सर्वोच्च अदालतले दोश्रोपटक प्रतिनिधिसभा पुनस्थापनाको निर्णय गर्दै ७ दिन भित्र प्रतिनिधिसभाको बैठक आह्वान गर्न आदेश दिएको थियो । सोही आदेश अनुसार पुनस्थापित प्रतिनिधिसभाको बैठक बसेको हो ।